IT-Med ходимлари янги «Соғлиқни сақлаш учун информатика ва маълумотлар фани» Стипендия дастурининг (IDASH) ўқув семинарларида қатнашиш учун Тбилисига (Грузия) ташриф буюришди. Ушбу дастур ЖССТ Европа бюроси, AҚШ касалликларни назорат қилиш ва олдини олиш марказлари (CDC) ва Вашингтон университети ҳамкорлиги доирасида амалга оширилаётган бўлиб, Шарқий Европа, Кавказ ва Марказий Осиё мамлакатларида ишга туширилади.

IDASH – бу 12 ойлик ўқув дастури бўлиб, жамоавий соғлиқни сақлаш информатикаси ёки маълумотлар фани соҳасида миллий даражада фаолият юритувчи, тиббиётнинг ўрта ва юқори даражадаги техник ва аналитик мутахассислари учун мўлжалланган.

Дастур жамоавий соғлиқни сақлаш ходимларининг ахборот тизимларини яратиш ва улардан фойдаланиш соҳасидаги ваколатларини оширади, шунингдек, миллий тизимларни кучайтириш ва минтақавий ҳамкорликни мустаҳкамлаш имконини беради. Бу эса ўз навбатида, соғлиқни сақлашдаги мавжуд ва кутилаётган глобал муаммоларга самарали ечим топишга олиб келади.