29 июн куни International Hotel Tashkent меҳмонхонасида “IT-Med” компанияси ходимлари, Ўзбекистон Соғлиқни сақлаш вазирлиги, Корея технологияларни ривожлантириш институти (KIAT) ва Inha университети вакиллари иштирокида бошланғич семинар бўлиб ўтди. Семинар Ўзбекистонда соғлиқни сақлашни инновацион ривожлантириш ва Корея Республикаси билан ҳамкорлик алоқаларини мустаҳкамлашда бошланғич нуқта бўлиб хизмат қиладиган “Ўзбекистонда рақамли саломатлик платформасини яратиш” лойиҳаси доирасида ташкил этилди.

Учрашувда томонлар ўзаро дўстона ва стратегик алоқаларни давом эттириш ҳамда замонавий AКТ ечимлари бўйича тажриба алмашишдан чуқур манфаатдор эканликларини таъкидлаб ўтдилар.
Лойиҳага кўра, Тошкентдаги И.Иргашева номли 4-сонли шаҳар клиник шифохонасида шифохона ахборот тизими (HIS), шахсий тиббий ёзувлар тизими (PcPHR), рақамли маслаҳат тизими (DCS) ва генетик платформа яратилиб жорий этилади. Мазкур тизимлар беморларнинг тиббий маълумотларини самарали бошқаришга, уларни хавфсиз сақлашга, тиббий ёрдамни янада самарали мониторинг қилишга ва тарқатишга, тиббий иш жараёнини стандартлаштиришга имкон яратади.

Семинарда Корея томони ушбу лойиҳада иштирок этишнинг батафсил режасини тақдим этиб, ушбу ахборот тизимини ривожлантириш жараёнини тавсифлаб берди ва ўз мамлакатидаги тиббиёт муассасаларида ҳам ана шундай тизим муваффақиятли жорий этилаётганига мисоллар келтирди. Лойиҳани жорий этиш жараёнида кореялик мутахассислар консалтинг ёрдами ва тизимнинг ишлаши бўйича тренинглар ўтказиб борадилар. Aсосий ходимлар рақамли соғлиқни сақлаш платформасини сақлаш бўйича билим ва тажриба алмашиш учун Кореядаги лойиҳа майдонига таклиф қилинади.